लोककल्याणकारी विज्ञापनको रकम बढाउन पत्रकार महासंघ काठमाडौंको माग

२९ मंसिर, काठमाडौं । नेपाल पत्रकार महासंघ काठमाडौं जिल्ला शाखाले लोककल्याणकारी विज्ञापन वापतको रकम बढाउन सरकारको ध्यानाकर्षण गराएको छ ।

महासंघको काठमाडौं जिल्ला शाखाले मंगलबार अर्थमन्त्री विष्णु पौडेललाई ९ बुँदे ज्ञापनपत्र बुझाउँदै लोककल्याणकारी विज्ञापन वापतको रकम बढाउन, सञ्चार माध्यमहरुलाई सहजरुपमा इन्धनको व्यवस्था गर्नलगायतका माग गरेको हो ।

‘प्रेस काउन्सीलले स्तरबृद्धि गर्दा चालु आर्थिक वर्ष लोककल्याणकारी विज्ञापनका लागि छुट्याइएको बजेटमा ५ करोड ११ लाख १५ हजार १२९ रुपैयाँ बजेट अपुग भयो । बजेट थोरै भएपछि सबैले नपाउने अवस्था आयो । त्यसैले बजेट बढाउन ध्यानाकर्षण गराएका हौं,’ महासंघ काठमाडौंका सचिव रामकृष्ण अधिकारीले जनाए ।

भारतको नाकाबन्दीका कारण इन्धन नपाएको र लोडसेडिङका कारण एफएम रेडियो चलाउन समस्या परेको भन्दै सञ्चालकहरुले बुधबारबाट एक घण्टा प्रसारण कटौति गर्ने तयारी गरेका छन् । यसैगरी पत्रपत्रिकाहरुले कागज ढुवानी गर्न नसकेर पृष्ठ कटौति गरेका छन् ।

समस्यामा परेका संचार माध्यमहरुको ऋण वापतको ब्याज छुट गरिनुपर्ने, पूर्ण समानुपातिक विज्ञापन नीति लागू गरिनुपर्ने, विरामी पत्रकारहरुले सहजरुपमा उपचार खर्च पाउने व्यवस्था मिलाउनुपर्ने लगायतका माग पनि गरिएको छ ।

पहुँच नपुग्ने पत्रकारहरुले उपचार खर्च नै नपाउने अवस्था छ, राज्यबाट पाउने सेवा सुविधा सबैले सहजरुपमा पाउनुपर्छ भन्ने हाम्रो मान्यता हो,’ अधिकारीले भने ।

अधिकारीका अनुसार सञ्चारमन्त्री शेरधन राईलाई पनि भेटेर ध्यानाकर्षणपत्र बुझाइने छ ।

ध्यानाकर्षण पत्र बुझ्दै अर्थमन्त्री पौडेलले मागप्रति सकारात्मक रहेको प्रतिक्रिया दिए । कतिपय विषयहरु सन्चार मन्त्रालयसँग पनि सम्वन्धित रहेको भन्दै उनले दुबै मन्त्रालयका पदाधिकारीहरुसँग छलफल गरेर अघि बढ्ने उनले प्रतिबद्धता जनाए ।

अर्थमन्त्री पौडेलले नाकाबन्दी केहि दिनमै हट्ने भन्दै अब आर्थिक सम्बृद्धितिर लाग्नुपर्ने धारणा राखे । त्यसका लागि मिडियाको सकारात्मक सहयोगको अपेक्षा सरकारले गरेको उनले जानकारी गराए ।