सामसुङ ग्यालेक्सी जेथ्री सार्वजनिक

मोटरसाइकलचालकका लागि ‘बाइक एस मोड’

अत्यधिक ट्राफिक चाप भएका स्थानमा मोटरसाइकल रोकेर कुरा गर्न खोज्दा दुर्घटनाको सम्भावना रहन्छ । मोटरसाइकल चलाइरहँदा महत्वपूर्ण फोनसमेत उठाउन नपाउनु धेरैको समस्या भएको हुन सक्छ ।

तर, अब भने यस्ता समस्याबाट छुटकारा पाइने भएको छ । किनभने, स्मार्टफोन कम्पनी सामसुङले २०१६ सामसुङ ग्यालेक्सी जेथ्रीमा मोटरसाइकल चालकको यही समस्या समाधानार्थ विशेष फिचरको व्यवस्था गरेको छ । कम्पनीले नयाँ स्मार्टफोनमा चालकको सहजताका लागि बाइक एस मोड नामक फिचर ल्याएको छ ।

यो फिचरले चालकले मोटरसाइकल चलाइरहेको अवस्थामा फोन आउँदा फोन गर्ने मानिसलाई स्वचालित आवाजको माध्यमबाट पछि फोन गर्न अनुरोध गर्छ । यसो हुँदा पछि कुरा गर्न मिल्ने भए तिनले फोन काट्छन् । अत्यावश्यक कुराकानी भए यसका लागि पनि विकल्प उपलब्ध छ ।

कसरी गर्छ काम ?
सामसुङ ग्यालेक्सी जेथ्रीमा एनएफसी अर्थात् नियर फिल्ड कम्युनिकेशन प्रविधिको प्रयोग गरेको छ । इनब्युल्ट एनएफसी चिप रहेको यो फोनको खरीदमा प्रविधि सञ्चालनका उपभोक्तालाई कम्पनीले एक थान एनएफसी ट्याग पनि उपलब्ध गराउँछ । यो ट्यागलाई प्रयोगकर्ताले आफ्नो हेल्मेट वा मोटरसाइकलको कुनै पनि स्थानमा टाँस्न सक्छन् । चालकले चिपकै माध्यमबाट एस बाइक मोडलाई सक्रिय वा निष्क्रिय गर्न सक्ने व्यवस्था फोनमा छ । एस मोडलाई सक्रिय (एक्टिभ मोड)मा राख्दा कसैको फोन आएमा तिनले स्वचालित भ्वाइस रेकडिङमार्फत पछि फोन गर्ने अनुरोध सुन्नेछन् ।

ग्यालेक्सी जेथ्रीमा ५ इञ्चको एचडी (७२०×१२८० पिक्सेल) सुपर एमोलेड डिस्प्ले छ । कम्पनीको नयाँ फोन एण्ड्रोइड ५.१ ललिपप सञ्चालन प्रणालीमा आधारित छ । कम्पनीले यसमा १४ ओटा भाषामा सन्देश बज्ने व्यवस्था मिलाएको छ । १ दशमलव ५ जीएचजेड क्वाडकोर प्रोशेसर सहितको यो फोनमा १ दशमलव ५ जीबी र्‍यामको व्यवस्था छ । त्यसैगरी फोनमा ८ जीबी आन्तरिक सञ्चय क्षमता छ ।

अतिरिक्त सञ्चय क्षमताको आवश्यकता परेमा माइक्रोएसडी कार्डको प्रयोग गरी यसलाई १ सय २८ जीबीसम्म बढाउन सकिन्छ । फोनमा तस्वीरका लागि एलईडी फ्ल्याससहितको ८ मेगापिक्सेल क्षमताको प्रमुख क्यामेरा जडान गरेको छ । त्यसैगरी सेल्फी तथा भिडियो कललगायतमा सहजताका लागि फोनमा ५ मेगापिक्सेल क्षमताको फ्रण्ट फेसिङ क्यामेरा पनि छ । भारतीय बजारमा यसको मूल्य भारू ९ हजार तोकिएको छ ।